ORASAUN NIA IMPORTÁNSIA

A.    Tanba sá orasaun ne’e importante liu

Iha asuntu rua ne’ebé halo ita moris iha ita-nia vida kristaun. Primeiru mak aprende Bíblia – Maromak ko’alia mai ita no segundu mak reza – ema (ita) ko’alia ho Maromak.

Bainhira ita aprende Bíblia ita sei hetan gia no responde liuhosi reza ho Nia. Bainhira ita reza, Espíritu Santu sei akompaña ita ba iha Maromak nia liafuan, no Liafuan ne’e rasik sei ko’alia ho ita. Ida ne’e mak, relasaun entre bainhira ita lee Bíblia no reza.

Iha razaun balun atu hatan tanba sá orasaun ne’e importante:

1. Tanba ezisténsia diabu no espíritu aat sira, no ORASAUN mak kilat ida atu kontra hasoru sira (Éfesu 6:12-13).
2. Tanba ORASAUN mak dalan hosi Maromak ba ita atu hetan saida mak ita presiza hosi Nia (João 16: 24, Tiago 4: 2).
3. Tanba Maromak fó baze iha apóstolu sira-nia moris ne’ebé rekoñese katak ORASAUN mak asuntu ida be importante liu iha kna’ar ka obra hosi sira-nia servisu (Apóstolu sira-nia hahalok 6:1-4).
4. Tanba ORASAUN hola parte prinsipál iha Nai Jezús nia moris (Markus 1:35, Lukas 6:12).
5. Tanba ORASAUN sei fanu ita nafatin atu matan-moris no neon nain hodi hein Nai nia mai (Lukas 21: 24-26).
6. Tanba ORASAUN ne’ebé Nai uza atu dudu ita-nia dezenvolvimentu espirituál (Salmo139: 23-24, Mateus 7: 7-8).

Orasaun halo buat ne’ebé haree ba imposibel sai posibel ka realidade liuhosi Maromak nia kbi’it.

B.     Sentidu no Objetivu Orasaun

Orasaun ne’e responsabilidade ita hotu nian nu’udar Kristaun.

1. Orasaun nu’udar prioridade.
2. Orasaun nu’udar obra ba Maromak
3. Orasaun nu’udar diálogu be úniku entre ita ho Aman Maromak iha Lalehan.
4. Orasaun rezulta ita-nia matan fiar nian nakloke atu ita haree ba iha natureza espirituál (mundu espíritu).
5. Orasaun nu’udar responde domin ba ema seluk ne’ebé responsabiliza hela ho kna’ar boot ruma.
6. Orasaun mak Maromak nia liafuan be moris iha ita-nia ibun.
7. Orasaun lori rezultadu ba Maromak nia reinu no hamamar Ninia fuan.
8. Orasaun loke dalan ba Maromak atu hatan ba mundu nia presiza.
9. Liuhosi orasaun ita simu Maromak nia hanoin
10. Tanba orasaun, Maromak nia reinu sai realidade liuhosi milagre sira be ita esperiénsia iha ita-nia moris loron-loron.
11. Liuhosi orasaun, Maromak bolu ita espiritualmente atu funu hasoru diabu to’o ita hetan vitória.
12. Orasaun mak konvite ba ita atu sente hakmatek iha Nai.