Relijiaun Katolika

Helena Kowalska moris iha Glogowiec, Polandia iha loron 25 Agustu 1905, nu’udar oan ba dala tolu hosi maun-alin nain sanolu no hosi família katólika ne’ebé laran-luak Stanislaw Kowalski no Marianna Babel. Stanislaw Kowalski nu’udar agrikultór no mós karpinteiru. Família Kowalski, hanesan ho povoasaun Glogowiec sira seluk, ne’ebé moris ki’ak no terus iha kolonializasaun Russia. Helena eskola to’o de’it iha klase 3 ensinu báziku. Nia labarik feto ne’ebé matenek no badinas, no mós umilde no jentíl, to’o halo ema barak mak gosta nia. Bainhira nia taumatan ba karau sira, Helena bainbain lee livru, ninia livru favóritu mak istória moris santu-santa sira-nian. Dalabarak nia halibur nia maluk sira no sai “katekista” ba sira hodi konta istória santu-santa sira-nian ne’ebé nia koñese. Bainhira Helena sei ki’ik, nia gosta reza. Dalabarak nia hadeer iha kalan fahe rua no reza mes-mesak to’o kle’ur. Bainhira ninia mamá haksi’ak nia, nia sei hatán, “Anju guada mak fanu ha’u atu reza.” ...