Konsellu ba Prostituisaun/moris sala-foer/impureza (Apóstolu Saun Paulu nia surat I ba Sarani sira iha Korintu 6:12-20)

 

Introdusaun

Iha moris sosiedade ohin loron (inklui Timor-Leste), sala prostituisaun mak sala ne’ebé dala-barak mosu iha sosiedade ohin loron. Kestaun ne’e loos duni nu’udar kestaun ida ne’ebé interesante, tanba era agora sei hanesan ho era iha sékulu primeiru, iha ne’ebé Apóstolu Paulu mós hasoru situasaun be hanesan iha moris sosiedade Korintu. Istória ema nian ne’ebé liu ona tinan 2000 depoizde era Jezús nian, hatudu katak sidauk bele sai no ses hosi sala ida ne’e. Mai ita haree hamutuk, saida loos mak Maromak nia liafuan hanorin mai ita kona-ba ne’e. Tuir mai ne’e mak observasaun ne’ebé foti hosi rekursu prinsipál hosi esplikasaun The Navaree Bible, kona-ba surat primeiru Saun Paulo nian ba sarani sira iha Korintu (1Korintu 6:12-20).

Kontekstualizasaun

Iha versíkulu ne’e, Apóstolu Paulu esplika kona-ba sala prostituisaun ka impureza ne’e todan. Krizi morál be akontese iha sosiedade molok Kristu nia mai (haree Roma 1:18-22) rezulta ona nasaun Pagaun balun lakon ona sentimentu sala iha asuntu sala seksuál. Tanba ne’e, Apóstolu Paulu dala-barak fó hanoin katak sala ne’e todan ba ema Kristaun sira be hahoris mai nu’udar nasaun Pagaun (haree iha Apóstolu sira-nia hahalok 15:29; 1Tesalónika 4:3-5).

Situasaun iha Korintu mós sériu uituan. Nu’udar sidade portu, sidade ne’e famouza nu’udar fatin atu hela provizoriamente hosi ema sira be tama no sai, no iha fatin ne’e mós harame ho sala seksuál. Ema Korintu barak adora maromak Aphrodite, no hahalok prostituisaun haree nu’udar hahalok konsagrasaun ba maromak ne’e. Tanba ne’e mak Apóstolu Paulu fó hanoin ba sarani sira iha Korintu be mai hosi sosiedade Pagaun ne’e, katak sala prostituisaun ne’e sériu tebes, no rezeita razaun saida de’it atu halo ka hatudu hahalok prostituisaun ne’e loos ka hahalok di’ak (1Korintu 6: 12-14). Apóstolu Paulu esplika kona-ba kestaun ne’e tanba sá sala ne’e kontra Jezús Kristu (1Korintu 6: 15-18) no Espíritu Santu (1Korintu 6: 19-20).

Reflesaun

Versíkulu 12-14. “Tudo me é permitido.” Apóstolu Paulu uza ekspresaun ida ne’e atu esplika kona-ba independénsia Kristaun, kuandu kompara ho Lei Torah Judeu nian kona-ba impureza tuir Lei, hahán, implementasaun Sábadu, no seluk-seluk tan, atu afirma independénsia be Kristu hetan ba ema liuhosi Ninia mate iha Kruz (haree Galasia 4: 31). Independénsia ne’e nia sentidu mak sarani Kristaun lasai ona atan bas ala, no hodi hola parte iha Baptizmu Kristun nian be nu’udar Liurai  ne’ebé hetan ona poder ba asuntu sira mundu nian. Maibé ema barak fó sentidu ba ida ne’e no uza sira-nia liberdade nu’udar “excuse” ka justifikasaun ba moris lahodi hafurak Nai nia mandamentu sira. Apóstolu Paulu esplika katak saida mak lakontra Maromak nia lei, ne’e buat ida ne’ebé fó lisensa, no saida mak kontra Maromak nia lei signifika monu filafali ba eskravidaun be antigu (ne’e mak eskravidaun ba sala).

Aman Igreija, Origen iha sékulu II esplika katak, “labele atu akontese, katak klamar ka espíritu tenke la’o lahamutuk sé de’it be akompaña nia no gia nia; tanba ne’e mak, tanba sá klamar ne’ebé hetan ona liberdade ho Kristu nu’udar ninia Liurai, esperiénsia katak Ninia naha-todan sai kamaan (haree Mateus 11:30) – diferente ho diabu be domina liuhosi dalan hodi hatodan (Origen). Kristu nia promesa katak Nia sei akompaña ita atu hala’o Ninia Lei sira, ne’ebé lo-loos ne’e tenke sai espíritu ba ita. Tanba hodi Ninia grasa, saida mak haree ba defisil ka imposivel iha mundu nia matan, sei bele ita hala’o ho ksolok, ezemplu, atu nafatin fiel iha kazamentu ba parseiru feen no la’en, no moris konsagradu ka selibatu ba relijiozu/a sira.

Fidelidade ne’e haree ba defisil atu to’o, kuandu ita uza óklu mundu nian, ne’ebé haree sala impureza mak nesesidade be razoável ba isin-lolon, hanesan kestaun ai-hán ba isin-lolon. Apóstolu Paulu rezeita ba hanoin ne’e, hodi esplika katak relasaun entre ai-hán no kabun lahanesan entre isin-lolon no prostituisaun. Nune’e mós isin-lolon latenke dirije ba kazamentu, tanba maski kazamentu ne’e presiza atu kontinua jerasaun ema nian, maibé kazamentu ne’e laabsolutu ba ema ida-idak (haree St. Pius V Catechism, II, 8, 12). Apóstolu Paulu hatuur isin-lolon iha esfera ka fatin ne’ebé aas liu: “Corpo para o Senhor eo Senhor para o Corpo”, no ne’e mak Maromak nia hakarak atu hasa’e isin-lolon liuhosi isin-lolon nia moris hias, atu moris filafali iha Lalehan aban-bainrua (haree Roma 8:11), iha ne’ebé ai-hán ka saida de’it be iha relasaun ho nesesidade fíziku lapresiza ona husi isin-lolon ne’e rasik.

Hodi diriji pesoa umana tomak – isin no klamar – ba Maromak, tanba ne’e virtude pureza iha ninia lisan pozitivu be aas. Hodi virtude ne’e, ita iha tendénsia atu prense ita-nia fuan ho domin ba Maromak, ne’ebé bolu ona ita la’ós atu halo aat, maibé atu moris iha santidade nia laran (haree 1Tesalónika 4:7).

Santu José Maria Escriva hateten katak, “kuandu ema ida iha Maromak nia Espíritu, pureza la’ós buat todan ida be defisil, no envergoñadu, maibé afirmasaun ida be enkoraza … Atu sai kastu, ita presiza hatuun sentimentu iha razaun nia okos, maibé ba sentidu be kastu, ne’e mak atu responde karidade nia ejizénsia… Virtude pureza ne’e hanesan liras be halo ita iha abilidade atu lori Maromak nia liafuan, Ninia mandamentu, iha no ba ne’ebé de’it iha mundu ne’e, lata’uk katak ita mós sai kontaminadu iha ninia prosesu. Liras ba manu sira, mak buat todan ida… Maibé lahodi liras, manu labele atu semo… (hanoin bá),  labele rende bainhira ita sente tentasaun barak, ho hanoin katak pureza mak buat todan ne’ebé labele atu hulan. Pasiénsia bá! Semo aas bá, hasoru loro-matan, atu to’o ba iha Domin nia Nain.”

Versíkulu 15-18. Apóstolu Paulu esplika katak todan tebes sala prostituisaun iha Nai Jezús nia matan. Ema Kristaun sai ona membru Kristu nia isin-lolon liuhosi Baptizmu. Nia tenke moris iha relasaun íntima ho Kristu, hodi hola parte ka simu moris hosi Kristu ne’e rasik (haree Galasia 2:20), sai “Espíritu ida ho Nia” (haree Roma 12:5; 1Korintu 12:5). Impureza seksuál (prostituisaun) mak sala be todan tanba ho sala ne’e, ema ida hakotu ninia relasaun ho Kristu nia isin-lolon, atu sai isin ida ho cadela/pelacur (haree 1Korintu 6:16). Tanba ne’e, sala impureza ka prostituisaun mak sala kontra isin rasik be nu’udar hosi Isin Místiku Kristu nian, no mós sala kontra Kristu be hakarak ninia pureza.

“Hadook ó-nia an hosi impureza ka prostituisaun” ne’e mak dalan ne’ebé tenke la’o tuir bainhira ita hetan tentasaun iha asuntu pureza. Tentasaun kontra virtude sira seluk bele prevene hodi hatuur ka monta barreira, maibé iha kestaun ida ne’e, Santu Tomas Aquinas hanorin katak, “laiha ema ida mak sei manan bainhira hatuur ka monta barreira, tanba kuandu ema dala-barak hanoin hela de’it kona-ba ne’e, nia sei hetan influénsia boot husi sala ne’e (prostituisaun). Nia sei manan kuandu nia halai dook hosi sala ne’e – ne’e mak liuhosi hadook an hosi hanoin sira be porno totalmente, no hadook an hosi oportunidade sira atu halo sala.”

Santu João Maria Vianey fó konsellu hanesan atu hala’o pureza: dahuluk, kuidadu ba saida mak ita haree, no saida mak ita hanoin, ita hateten no ita halo; daruak, proteze-an iha forsa orasaun nian; datoluk, nafatin simu sakramentu ho loos; dahaat, halai hosi saida de’it mak bele tenta ita atu halo sala ne’e; dalima, devosaun boot ba Virgen Maria. Kuandu ita halo buat sira ne’e hotu, signifika lahanoin barak tan ba saida de’it mak ita-nia inimigu sira halo, no lahanoin barak mós katak virtude be ita iha sei frazil liu, maibé ita bele fiar katak ita sobrevive dadaun iha nia laran (iha virtude pureza).”

Versíkulu 19-20. Prostituisaun la’ós de’it hafoer Kristu nia Isin-lolon, maibé mós hafoer temple Espíritu Santu – tanba Nai hela iha klamar, liuhosi grasa hanesan mós iha igreija ka templu (haree 1Korintu 3:16-17). Tuir Santu José Maria Escriva “Orasaun kontemplativa sei sa’e iha ó-nia laran, bainhira ó reflete realidade be impresiona tebes: ‘buat ida be ho lisan materiál hanesan ha’u-nia isin-lolon ne’e, Espíritu Santu hili ona atu sai fatin be Nia horik…. Ha’u la’ós ona ha’u nian rasik …. Ha’u-nia isin no klamar, buat tomak hosi ha’u, Maromak nian…’ No orasaun ne’e iha konsekuénsia prátiku barak, be mai hosi konsekuénsia boot be hanorin husi Apóstolu Paulu: “Glorificai, pois, a Deus no vosso corpo” (1Korintu 6:20).

 “Maromak sosa kotu tiha ona ó, no ó nia folin selu kotu tiha ona”: Ita-nia redensaun husi Kristu, ne’ebé hetan hosi Ninia mate iha Kruz, ne’e mak valór be selu atu redemir ema tomak hosi sala no mate. “tanba ó hatene, katak ó ser resgatados hosi ó-nia dalan moris ne’ebé folin laek be ó hetan hosi ó-nia beiala sira la’ós ho sasán be folin laek, la’ós mós ho osan-mutin no osan-mean, maibé ho raan be karun, ne’e mak raan Kristu nian be hanesan raan bibi-oan be laiha sala no ladefisiénte” (1Pedro 1:18-19; Éfesu 1:7). Tanba razaun ne’e, ita la’ós ona ita-nia rasik, ita agora Kristu nian. Ita hotu membru Kristu nian, Maromak nia templu Espíritu Santu. Reflesaun ba lia-loos ne’e tenke nafatin lidera sarani Kristaun atu moris tuir ida-idak nia vokasaun, nu’udar Maromak nia oan sira.

Papa Leão Magno hateten, “sarani Kristaun, hanoin bá, sé loos mak ó; ó hola parte tiha ona iha Nai nia natureza. Tan ne’e, labele hanoin atu filafali ba ó-nia hahalok aat be uluk. Hanoin ba katak sé loos mak ó-nia Ulun agora, no be iha Nia isin-lolon, ó mak Ninia membru. Labele haluha katak ó hetan ona liberdade hosi poder nakukun no lori ona ó ba naroman, ba reinu Maromak nian. Obrigadu ba sakramentu Baptizmu, ó sai ona Templu Maromak Espíritu Santu nian. Labele hanoin atu duni sai Bainaka boot ho ó-nia hahalok aat; labele hanoin atu hatuun ó-nia an ba eskravidaun satanás nian, tanba valór be selu tiha ona ba ó mak Kristu nia Raan rasik”

Versíkulu 20. “Glorificai, pois, a Deus no vosso corpo”. Hanorin ne’e mak konsekuénsia lójika hosi dogma Apóstolu Paulu sira seluk be hateten, “pureza nu’udar virtude ida, ne’e mak kapasidade atu domina isin-lolon rasik iha santidade nia laran no tribute (haree 1Tesalónika 4:4). La’o ho grasa pureza nu’udar fruta hosi Espíritu Santu nia hela iha ita-nia isin-lolon be nu’udar templu, rezulta dignidade be aas ne’ebé relasaun metin ho Nai rasik, tanba ne’e Maromak hetan glória iha ita-nia isin-lolon rasik. Pureza é a glória do corpo humano aos olhos de Deus. Type text or a website address or translate a document.

Cancel

Example usage of "":

automatically translated by Google

Pureza é a glória de Deus no corpo humano" (Papa João Paulu II, General Audience, 18 March 1981).

Iha esplikasaun kona-ba versíkulu ne’e, Santu João Crisóstomo fó hanoin kona-ba saida mak Nai Jezús hateten iha Mateus 5:16 – “Assim brilhe a vossa luz diante dos homens, de modo que, vendo as vossas boas obras, glorifiquem o vosso Pai, que está no Céu” – atu hatudu katak ema Kristaun nia moris be moos tenke diriji sira be hela iha sira-nia sorin-sorin ba Maromak. “Bainhira sira haree ema santu ida halo virtude be aas liu, sira tenke atu reflete (sira-nia an) no sira sei vergoña hodi haree diferénsia entre sira-nia moris no ho moris ema ida nian be nu’udar disípulu Kristu nian be fiel. Tanba bainhira sira haree ema ida be iha natureza be hanesan, maibé bele sai ‘aas’ liu sira (tanba virtude pureza ne’e rasik)… sira tenke fiar katak forsa ida be Divina servisu ona iha ne’e, atu rezulta santidade ne’e rasik.

Konkluzaun

Kuandu ita haree ema santu/a barak iha istória Igreija nian, be iha karidade ne’ebé perfeitu ba Maromak no ba ema, nune’e mós ita hakru’uk hodi rekoñese katak boot duni grasa Maromak nian be bele hatuun ba sira be hakarak duni atu servisu ho Ninia grasa, hodi realiza Nai nia planu ba sira-nia moris. Laiha ida mak imposivel ba Maromak, atu tulun ema ida-idak be hakarak luta atu moris di’ak liután, moos liután, no santu/a liután loron-loron.

Ba relijiozu/a sira, virtude pureza ka kastidade realiza iha no liuhosi fidelidade hodi kuidadu kastidade isin no klamar, be loos iha votu moris selibatu ka konsagradu, ba Maromak nia Reinu. Ba feen no la’en sira, virtude pureza ka kastidade ne’e prinsipalmente realiza iha no liuhosi prontudaun atu fó domin be totál no inkondisionál ba nia par, iha relasaun domin nu’udar feen no la’en nia laran, ne’ebé nafatin nakloke ba posibilidade moris foun.

husi

Facebook: Crs Frts Pra

Crisogno.soares.freitas.p@gmail.com
Interpreta hosi www.katolisitas.org