Konseitu báziku Servidór/a Altar ka Akólitu

1.      Maun-alin

Ita la’ós de’it grupu feto no mane ne’ebé serbí iha Missa ka halimar hamutuk. Ita la’ós klubu tebe bola nian ka grupu múzika nian. Ita mak maun-alin ba maun alin sira seluk iha Kristu. Ita reza, halimar, ajuda malu no haksolok hamutuk iha moris ne’e nu’udar maun-alin iha Kristu. Tanba ne’e, ita bolu ita-nia-an ho títulu ofisiál mak Akólitu ka servidór/a altar.

 

1. Saida mak servidór/a altar? Servidór/a altar mak ema feto no mane ne’ebé serbí iha Santa Missa ka iha selebrasaun Eukarístia. Iha prátika, servidór/a altar ne’e mós sai servidór/a iha selebrasaun liturjia oin-oin no orasaun ne’ebé la’ós de’it iha Santa Missa. Importante liu mak deskobre sentidu servisu ida ne’e, sai servidór/a altar mak sai labarik joven feto no mane ne’ebé serbí altar. Iha sentidu simbólika liturjia Igreja nian, Altar ne’e simboliza Jezús Kristu rasik. Iha momentu Santa Missa, Nai Jezús Kristu rasik mak iha altar ne’e nia leten ho forma Paun no Tua ne’ebé ita simu iha komunga. Tan ne’e feto-mane ne’ebé ajuda Missa hanaran servidór/a Kristu nian ka akólitu.

 

2. Saida mak diferénsia entre akólitu no servidór/a Kristu nian? Liafuan akólitu mai hosi lian Gregu katak Akoluthos ne’ebé signifika servidór ka disípulu. Akólitu ne’e bain-bain refere liu ba frater sira ne’ebé prepara-an atu sai amu-lulik. Iha etapa ne’e, molok frater sira atu ordena ba Diákonu ka amu-lulik, presiza iha tomada de posse atu sai akólitu, nune’e mós sai leitór. Frater sira ne’ebé sai akólitu ne’e mak servidór Santu Padre iha selebrasaun Eukarístia. Maibé tanba frater sira ne’e labarak, Igreja Katólika mós fó oportunidade ba labarik no joven sira feto no mane atu sai servidór/a iha altar santu. Tanba ne’e labarik no joven sira feto mane mós bele bolu akólitu, maski la-hanesan ho frater sira ne’ebé prepara-an atu sai diákonu no amu-lulik.

 

3. Saida mak knaar akólitu iha selebrasaun Santa Missa? La-bele hanoin katak sai akólitu ne’e atu harame de’it selebrasaun liturjia Eukarístiku. Knaar akólitu mak vokasaun ida ne’ebé hosi Maromak ba labarik joven feto no mane atu serbí Kristu iha Altar. Fundamentalmente liturjia Igreja ejiji ezisténsia hosi partisipasaun ativamente, nakonu no konxiénte hosi sarani iha selebrasaun liturjia. Selebrasaun liturjia la’ós acting ka palku muzikál ka modeling, atu hatudu hodi hareme ambiente selebrasaun. Maibé, Igreja hakarak atu sarani ida-idak partisipa ativu nu’udar partisipante ne’ebé nakonu no kompletu. Tanba ne’e, knaar akólitu mak atu halo tuir ukunfuan Igreja hodi sai partisipante ativu iha liturjia Igreja nian. No hodi sakramentu Batizmu no Krizma, akólitu sira tenke ona sai Katóliku ne’ebé ativu, no partisipa mós iha knaar oin-oin no responsabiliza ba Igreja nia moris.

 

4. Akólitu mós iha ninia espiritualidade. Espiritualidade akólitu mak sai servidór/a. Serbí tuir Igreja Katólika ninia doutrina mak ema ne’ebé serbí Maromak no Maromak nia povu, liu fali atan ba Nai ne’ebé fó-an tomak ba Maromak nia liafuan no Nia obra iha Maromak nia povu santu nia leet. Tanba ne’e, kuandu bolu akólitu signifika servidór/a Maromak nian, ne’ebé kada akólitu nia moris presiza sai lo-loos ho Maromak nia liafuan ne’ebé selebra no sakramentu sira ne’ebé selebra. Ne’e signifika mós katak akólitu tenke badinas lee Bíblia, tuir Missa tantu ajuda Missa ka la-ajuda Missa, hakarak nafatin atu hakbesik-an ba sakramentu konfesa, no kuandu tinan to’o ona presiza simu sakramentu Krizma. Sai akólitu tenke konxiénte ba saida no sé mak nia serbí. Akólitu, tenke hatene mós katak altar ne’e simboliza Kristu. Tanba Kristu rasik mak iha ne’ebá. Bainhira tuir Missa ka ajuda Missa la-bele haree amu-lulik nia an ne’ebé selebra Missa, maibé haree nia (amu-lulik), nu’udar Kristu moris ne’ebé prezente iha amu-lulik refere. Tanba ne’e, sai akólitu presiza reza, tuir Missa, iha devosaun tantu liuhosi reza tersu, novena, adora Santísimu Sakramentu, no badinas lee Bíblia, atu hatene Kristu.

 

5. Oinsá estrutura akólitu? Nu’udar maun-alin iha Kristu tenke servisu iha grupu ne’ebé hetan fiar atu organiza grupu akólitu la’o ho di’ak. Iha grupu akólitu, presiza kria estrutura ne’ebé efetivu no efisiente. Ho razaun ne’e mak, iha grupu ne’e nia laran presiza kordenadór/a ka xefi, sekretáriu/a, tezureiru no seksaun sira seluk. Iha grupu akólitu presiza mós ema moderadór/a tantu mai hosi Team liturjia Parókia nian ka ema ida-ne’ebé iha kapasidade atu akompaña no iha fuan atu ajuda. Ema ne’e presiza hetan koñesementu hosi amu pároku ka ninia konsilleiru sira.   

 

6. Oinsá atu grupu akólitu ne’e moris no dezenvolve nafatin? Iha sujestaun ruma ne’ebé bele sujere ba membru akólitu sira.

Hili animadór/a ne’ebé di’ak. Di’ak iha ne’e la-signifika de’it atu hatene knaar akólitu sira-nian, maibé iha kapasidade atu treina no iha fuan!

Husu ba amu pároku ka konsilleiru parókia atu haruka ba imi, moderadór/a ne’ebé di’ak tantu iha koñesementu no kapasidade maibé tenke iha fuan. Moderadór/a ne’ebé di’ak la-signifika hatene de’it liturjia ka iha fuan maibé mós iha abilidade komunikasaun di’ak ho amu pároku no ninia konsilleiru sira.

Presiza iha enkontru hamuruk ho akólitu hosi parókia seluk depende ba programa. Ida ne’e presiza tanba atu bele fahe ba malu matenek ne’ebé sira esperiénsia iha grupu ne’e nia laran. Iha parte seluk mós bele treina hamutuk.

Programa enkontru presiza iha variedade: bele halo seminár ka konferénsia kona-ba liturjia, sakramentu sira, Maria, no seluk-seluk tan. Bele mós kria amizade ba malu liuhosi programa desportu, múzika ka teatru.

Bele karik presiza iha retiru anuál hamutuk ho akólitu tomak Dioseze nian ka parókia nian kada tinan ida dala rua (molok Páskua ka molok Natál), ba balo vizitasaun iha konventu tanba ida ne’e mós hola parte iha asaun vokasaun ba ema ida entre akólitu atu sai amu-lulik ka madre iha futuru. Bele mós iha nivel Dioseze kria inkontru anuál ne’ebé halo halibur hamutuk akólitu hotu atu tuir seminár hosi Amu-Bispu ka amu-Paróku.

Keta haluha bolu imi-nia alin sira iha imi-nia fatin atu sai mós akólitu foun iha parókia ka Dioseze, atu nune’e, akólitu la-bele mate maibé nafatin iha jerasaun foun atu kria maun-alin iha Kristu hodi serbí Kristu iha altar.

 

2.      Kristu mak lider no maun

Ita rona tiha ona dala-barak kona-ba Jezús tantu iha uma, iha eskola no iha Igreja. Iha grupu akólitu, ita hasoru dala ida tan ho Jezús, maibé ho dalan ne’ebé besik liután.

Jezús ne’e rasik sei mai tama iha ita-nia moris loron-loron, iha dalan oin-oin hanesan liuhosi dalan grupu akólitu, iha uma, iha eskola, iha ita-nia halimar fatin, iha Igreja no iha ne’ebé ita eziste ka iha.

Iha ita-nia grupu ne’e nia laran, Kristu hatuur iha sentru. Ita hale’u Nia, atu besik liután ho Nia no tuir Nia. Nia mak ita-nia lider, no Maun Boot. Ita mak Ninia disípulu sira, Ninia alin sira. Ho no iha Kristu, ita forma maun-alin. 

Atu moris nu’udar maun-alin ne’e dalaruma difilis. Dalaruma ita hirus malu, dalaruma ita la-haree malu nu’udar maun-alin. Tanba ne’e, Kristu hamutuk ho ita, nu’udar ita-nia lider. Nia hatudu dalan loos ba ita, ita halo buat di’ak hosi ita-nia rasik atu tuir Nia.

Hosi buat hotu sira ne’e, Nia hanorin ita atu hadomi nu’udar Nia halo, no hadomi Nia nune’e mós sira seluk nu’udar maun-alin, oan sira hosi Aman ida.

 

3.      Amizade ne’ebé haksolok

Bainhira ita hamutuk, ita atu koñese, respeitu no sai maluk ba malu. Ita haksolok ba malu iha grupu nia laran. Ita haksolok hodi bele fahe ba malu ita-nia moris. Ita-nia hamutuk ne’e harii ita, iha amizade ksolok nian.

Buat ne’ebé presiza atu hanoin mak, ita-nia grupu akólitu nu’udar komunidade Igreja nian, iha-ne’ebé kria ambiente maun-alin ba malu no Kristu mak sai sentru, nune’e mós nu’udar Maun Boot no lider ba ita-hotu, atu ita hotu bele moris iha amizade ksolok nian. Amizade ksolok ne’e harii iha Maromak nia liafuan ne’ebé haforsa husi Eukarístia no orasaun, atu nune’e, ita sai fuan di’ak iha amizade nia laran liuhosi serbí ba malu iha Kristu.

 

4.      Objetivu servidór/a altar (akólitu)

Ita haksolok atu hola parte iha grupu akólitu. Iha ita-nia maun-alin ne’e, ita bele buras nu’udar Kristu nia disípulu ne’ebé loos ka auténtiku, no tau buat hotu iha Kristu nia-An Ema ne’ebé Perfeitu.

Grupu akólitu nia objetivu mak:

1. Atu dezenvolve grasa hotu hosi ita-nia isin lolon, hanoin no fuan,
2. Atu sai maluk ne’ebé besik liután iha Kristu
3. Atu sai membru komunidade Igreja ne’ebé ativu.
4. Atu haprontu-an harii Maromak nia reinu iha mundu ne’e.

Presiza hanoin mós katak iha grupu akólitu nia laran objetivu jerál mak:

1. Maturidade umana: Iha ne’ebé membru sira esperiénsia Maromak iha sira-nia moris loron-loron liuhosi sira-nia domin no servisu ba Maromak no ba sira-nia ‘viziñu’.
2. Relasaun ho Kristu: Iha ne’ebé membru sira bele buras iha santidade Kristaun, liuhosi haburas sorumutu no relasaun ho Kristu ne’ebé prezente iha liturjia no iha Eukarístia.
3. Membru iha Igreja: Iha ne’ebé membru sira nu’udar grupu, presiza tau konxiénsia prátika, atu kontribui hodi haburas komunidade Kristaun iha sira-nia eskola no parókia liuhosi preparasaun no selebrasaun ne’ebé iha sentidu litúrjiku no liuhosi sira-nia prontudaun no suporta iha programa no atividade sira hosi komunidade.
4. Komitmentu ba Reinu Maromak nian: Iha-ne’ebé membru sira, nu’udar indivíduu, tenke sai sasin Kristu nian, ne’ebé agora nu’udar Apóstolu joven no iha loron ida sai maduru iha Kristaun, liuhosi espíritu orasaun ne’ebé auténtiku no halo relasaun íntima ho Kristu liuhosi dalan fiar iha Kristu, ida-ne’ebé mai atu serbí no fó.

 

5.      Motto

Akólitu nia motto mak “BOLU ATU SERBÍ”, tanba Kristu rasik fó ba membru akólitu sira motto ne’e. Nia sai Ema Ida-Ne’ebé hanesan ita hotu, no hili dalan atu terus no mate. Tanba ne’e Jezús bolu ita “para servir e não para ser servido” signifika katak atu serbí no la’ós ema seluk serbí filafali ita.

Liuhosi motto ne’e, akólitu nia protetór (Santu Tarsíziu) fó ezemplu ba akólitu sira iha mundu tomak atu fó nia isin tomak hodi truka sai Kristu nia isin rasik, tanba ho ita-nia isin ne’ebé konsagra ona ba Kristu ita hola parte ona iha Kristu. 

 

6.      Orasaun

Orasaun akólitu sira-nian (Orasaun ida ne’e di’ak liu reza molok atu ajuda Missa tantu iha grupu no individu)

Nai, Ha’u mak ne’e, ha’u Ita-nian, ne’ebé prontu atu serbí Ita.

Ha’u sei hamrik metin iha fiar hodi hala’o ha’u-nia knaar sai servidór iha Santa Missa no ajuda iha Igreja, ha’u sei hamrik metin atu hatudu ezemplu di’ak ba ema hotu no ajuda sira atu respeitu Ita-nia Uma Kreda. 

Husik ha’u atu sai Ita-nia disípulu Altar nian ho ajuda hosi Inan Maria, no Santu Tarsíziu nu’udar modelu santidade nian. Amen.

7.      Patronu

Akólitu nia patronu mak Jezús Kristu, Ida ne’ebé ekspresa Nia domin liuhosi Ninia Sagrada Coração, ne’ebé suli mai Raan Santidade nian. Nu’udar sarani, ita mós hasoru Nia iha Sakrementu Eukarístia Santa hodi han no hemu Ninia Isin no Raan rasik ne’ebé fó ba ita moris rohan laek. 

Santu Tarsíziu nu’udar akólitu ninia protetór ne’ebé sai ezemplu fidelidade ba Kristu Jezús to'o mate.

8.      Mehi ka vizaun akólitu

Akólitu prontu atu ajuda iha diferente atividade no projetu parókia nian, eskola nian no iha hela fatin (komunidade). Akólitu fahe iha nia mehi ka vizaun harii Maromak nia Reinu iha mundu ohin loron.

Agora nu’udar labarik joven feto no mane iha grupu akólitu, tenke buras iha domin ne’ebé besik liu no iha devosaun ba Jezús Kristu ne’ebé prezente iha dalan espesiál iha Santísimu Sakramentu. Atu nune’e, ikus mai bainhira sai adultu, espera katak bele sai membru iha grupu liturjia adultu nian: ezemplu sai minístru ekstraordináriu Eukarístia nian, komitee liturjia nian no team planeamentu ba atividade liturjia ka Igreja nian no seluk-seluk tan.

Akólitu aprende atu loke-an ba orasaun, no iha momentu orasaun públiku no privadu atu haforsa ema iha atividade ka knaar loron-loron nian. Iha tempu hanesan, membru akólitu aprende dedika nia-an iha servisu ba nesesidade maun-alin sira-nian. No ikus mai, bainhira sai adultu iha sosiedade, espera katak bele moris no prátika espíritu orasaun no jenerosidade atu serbí ema seluk.

Fó tempu ba Igreja no interese iha liturjia Igreja nian, membru akólitu aprende barak kona-ba amu-lulik no moris relijioza/a. liuhosi introdus kona-ba “Maromak”, no hein katak membru ne’e tantu pesoál no grupu loron ida bele rona Kristu nia bolu ho sensibilidade boot no responde ba bolu ne’e ho jenerosidade boot.

Iha grupu akólitu ne’e, nia objetivu importante mak atu dezenvolve labarik joven feto mane nia espiritualidade ne’ebé diriji ba santidade, liuhosi, fó importánsia boot ba Eukarístia no atu hodomi vokasaun ‘bolu atu serbí’ iha momentu espesiál ‘orasaun’ nian. Orasaun ne’e mak liturjia Eukarístia ne’ebé tenke prepara ho di’ak no solemne, hodi sai selebrasaun signifikante.

 

9.  Mandamentu sanolu akólitu nian

1. Responsavel no badinas.
2. Disponivel.
3. Atensaun nafatin.
4. Sai ezemplu.
5. Kuidadu iha hatais ba isin-lolon no jestu isin-lolon nian.
6. Estuda maka’as no kontinua.
7. Konsidera no fó onra ba ninia família.
8. Respeitu ema hotu.
9. Sai amigu ne’ebé loos no moos.
10. Nunka haluha orasaun.

Hakerek husi Crisogno Soares F. Pereira