Orasaun ba noivu-noiva ne’ebé simu sakramentu matrimóniu

 

Hodi Padre, hodi Fillu, hodi Espíritu Santu, Amén

Orasaun ba noivu-noiva ne’ebé simu sakramentu matrimóniu

(Orasaun ne’e reza iha festa kazamentu tempu konfraternizasaun)

 

Aman domin-na’in,

iha loron ne’e, ami agradese ba ksolok ne’ebé (……………. & ……………..)

ohin simu hosi Ita-Boot.

Durante tinan barak ona, iha sira-nia moris,

Ita-Boot sempre akompaña sira,

no ohin loron, Ita-Boot halo sira sai ida de’it iha matrimóniu kristaun santa ida-ne’e.

Aman Maromak, haraik ba sira Ita-nia bensaun,

Tanba sira hakesi ona domin ba Ita-Boot no ba malu.

Sira hetan salvasaun ho Ita-nia Oan Jezús Kristu nia Raan ne’ebé folin liu no moos liu,

ne’ebé haforsa ona husi Ita-nia grasa domin ne’ebé santa.

Espera katak, sira-nia moris nakonu ho grasa bondade no fidelidade ba Ita no ba malu,

no iha fé no karidade ne’ebé nunka atu lakon iha sira-nia uma sagrada ne’ebé sira harii hamutuk. Atu nune’e, sira-nia moris tomak bele monu ba Ita laran.

 

Inan Maria grasa barak liu, hamutuk ho Saun José

prepara uma ksolok nian iha Nazaré ba Jezús,

lori Ita-nia família foun ne’e ba iha Ita-nia protesaun nu’udar Inan ba sira.

Ita mak ida-ne’ebé sempre hatudu interese ba noivu-noiva foun ne’ebé festeza sira-nia kazamentu iha festa Kanã, ajuda no gia mós noivu (………) no noiva (………) ne’e iha sira-nia moris nu’udar kaben-na’in iha sira-nia uma sagrada no iha komunidade nia leet.

Espera katak, sira-nia uniaun iha mundu ne’e diriji sira ba uniaun eterna lalehan nian,

iha-ne’ebé, ema hotu hetan bensaun no uniaun

hodi hahí-hana’i Santísima Trinidade Maromak mesak ida de’it.

Amén.

 

Ami Aman (1x)

Ave Maria (3x)

Glória (1x)

Hodi Padre, hodi Fillu no hodi Espíritu Santu, Amén.