ORASAUN KALAN


Obrigadu Aman Maromak,

iha momentu ne'e,

iha-ne'ebé Ita-Boot fó lisensa mai ha'u

atu loke filafali ha'u-nia fuan ba Ita-Boot.

 

Iha-ne'e, ha'u agradese,

tanba liuhosi ema oin-oin

Ita-Boot hakonu ona ha'u

ho epíritu no forsa atu la'o ba oin.

 

Obrigadu Aman,

tanba Ita-Boot tulun ha'u,

tanba Ita-Boot haroman ha'u-nia dalan loron-loron nian.

Tanba Ita-Boot halo ha'u forte hasoru buat oin-oin, ne'ebé ha'u tenke liu.

 

Tanba Ita-Boot uza ha'u

no ha'u kaer metin Ita-nia liman

ne'ebé nafatin nakloke ba ha'u,

hodi la interese sé loos mak ha'u.

 

Loron ohin ne'e,

ha'u kompriende tan katak,

loos duni, ha'u-nia vida iha nia sentidu

bainhira totalmente hamutuk ho Ita-Boot.

 

Iha momentu ne'e,

Ha'u hasa'e ha'u-nia fuan ba Ita-Boot,

bainhira ha'u toba,Ita-Boot ne'ebé iha forsa,

halo livre ha'u-nia fuan

hosi lembransa oin-oin,

hosi kanek loron tomak ohin nian.

 

Halo livre fuan ne'e,

hosi sentimentu perigozu sira,

no prepara fuan ne'e

ba loron aban nian

atu prontu hodi luta ba moris ne'ebé nakonu

ho domin, hakmatek, pás no armonia.

 

Sofrimentu barak

ne'ebé ha'u esperiénsia

kauza hosi disizaun ne'ebé ha'u halo

hodi haketak an hosi Ita.

 

Tanba ida-ne'e,

buat ne'ebé ha'u hakarak liu mak

sente iha relasaun íntima ho Ita-Boot,

sente Ita-Boot nia forsa kona iha ha'u fuan

ne'ebé halo ha'u moris fali.

 

Kona ha'u-nia fuan ba!

atu nune'e, ha'u bele haree ba oin

no buka hatene posibilidade hotu

nu'udar solusaun ba ha'u-nia moris.

 

Obrigadu Aman,

tanba hamaluk ona ha'u iha loron ohin

no ha'u sente duni Ita-Boot nia domin

no Ita sempre iha ha'u sorin.

 

Obrigadu ha'u Aman,

ha'u hatene katak iha kalan ne'e,

Ita-Boot sei kuidadu ha'u

no hela iha ha'u fuan to'o loron aban,

iha-ne'ebé hafanu ha'u ho loron-matan kmook ksolok nian.

 

Ha'u husu Ita-Boot ne'ebé nakonu ho fuan mizerikordia,

atu halo nune'e mós ba ema hotu no ha'u-nia família,

atu nune'e, la iha ema ida hosi sira sente mesak,

iha sira-nia luta no funu ba loron aban nian.

 

Amen.

 

Crisogno Soares Freitas Pereira

 


Comments

Post a Comment

Popular posts from this blog

Orasaun Rozariu Familia nian

Image
Hodi Padre, Hodi Fillu, Hodi Espíritu Santu nia naran. Amen. Hanoin buka sala hotu-hotu….!!! Ita reza hamutuk: Nai, Ha’u nia Maromak, ha’u tau konfiansa tomak iha Ita domin ne’ebé nakonu ho perdaun, husik ha’u-nia fuan haksolok iha Ita-Boot nia ajuda salvasaun. Amen. Intensaun: Segunda : Iha ita-nia orasaun Rozáriu kalan ne’e nian, ita husu atu Aman Maromak liuhosi Inan Maria ne’ebé nakonu ho grasa, haraik mai ita família ki’ik ida-ne’e saúde di’ak isin no klamar no hasai ita hosi ‘moras ta’uk’, nune’e mós ba maun-alin no feto-nan sira hotu nia intensaun. Tersa : Iha ita-nia orasaun Rozáriu kalan ne’e nian, ita husu atu Aman Maromak liuhosi Inan Maria ne’ebé nakonu ho grasa, atu nafatin proteze ita-nia ‘uma’, rain ne’ebé pertense ba ita família ida-ne’e, no mós ba ita-nia jerasaun hosi buat aat hotu, sala, ódiu, figansa no segesaun, no hosi espíritu-aat no ema-aat sira no hosi ai-moruk-aat sira hotu. Kuarta...
Read more

ORASAUN BAINHIRA IHA SITUASAUN DIFISIL

Image
NOVENA BA NA'I JEZÚS NIA FUTAR FUAN SANTU (Novena ne'e reza iha oras ne'ebé tenke hanesan durante loron sia nia laran) + Hodi Padre, hodi Filho, hodi Espíritu Santu sira naran, Amen. ORASAUN HAHÚ Ami Aman Ami Aman be iha lalehan, halo ami hahí-hanai Ita naran, halo Ita-nia Reinu to'o mai ami, Ita-nia hakarak halo tuir ba iha rai nu'udar iha lalehan. Ohin ne'e haraik ai-hán lor-loron nian mai ami, haraik perdaun ba ami salan nu'udar ami perdua ema halo aat ami, la bele husik ami monu ba tentasaun, maibé hasai ami hosi aat, Amen. Ave Maria... Gloria... ITA HAROHAN Oh... Na'i Jezús, Ita-Boot hateten: "Husu ba, no Ha'u sei haraik ba ó, buka ba no ó sei hetan, dere odamatan ba, odamatan sei nakloke ba ó." Ho intersesaun Maria Ita-nia Inan Santa, ha'u bolu Ita, ha'u buka no husu ba Ita-Boot atu rona ha'u-nia pedidu ne'e .....  ( Temi pedidu ne'ebé ó iha ) Oh... Na...
Read more

BIBLIA (SAGRADA ESKRITURA)

Image
Introdusaun Iha artigu, ita sei aprende lia-loos sira ne’ebé ajuda ita atu sai ema Kristaun kuandu ita fiar nia. Lia-loos sira ne’e mós sei ajuda ita atu moris iha moris Kristaun kuandu ita ema ida ne’ebé fiar ona. Objetivu hosi lisaun ida ne’e mak atu ajuda ita moris iha koñesementu kona-ba Maromak nia liafuan. Lisaun dahuluk hosi enkontru semana sanolu resin tolu mak koñesementu kona-ba Bíblia jeralmente no oinsá ita bele hetan Bíblia ne’e rasik, nune’e mós tanba sá ita presiza estuda Bíblia. Iha parte seluk mós ita sei diskute kona-ba lia-loos hosi Bíblia ne’e rasik no ba sé Bíblia ne’e eziste. 1.       Saida mak “Bíblia”? Bíblia mak livru sagradu Kristaun Katólika sira nian. Dala ruma Bíblia ne’e mós hanaran Evanjellu, maski lo-loos ne’e termu Evanjellu só refere de’it ba evanjelista nain haat (Mateus, Markus, Lukas no João) hosi livru 73, ne’e mak livru haat primeiru hosi testamentu foun. Bíblia Igreija Katólika kompostu hosi li...
Read more