Orasaun simu illas São João Bosco & Orasaun despedida ba illas São João Bosco

Orasaun simu illas São João Bosco

Aman Maromak, ami agradese Ita-Boot

ba buat di’ak hotu ne’ebé Ita halo mai ami

liuhosi Ita-nia atan di’ak João Bosco.

Ita-Boot halo nia sai santu tanba ninia domin ba Ita-Boot

hodi halo saida mak Ita-Boot haruka ba nia.

Nia hala’o misaun ne’ebé mai hosi Ita-Boot,

no misaun ne’e moris to’o ohin loron tanba Ita-Boot.

Ita-Boot fihir nia sai aman, mestre no belun ba foin-sa’e sira,

liuliu sira-ne’ebé kuran liu no abandonu.

Ita-Boot fó ba nia grasa

atu hatudu dalan loos ba ema sira-ne’ebé nia hasoru,

liuliu foin-sa’e sira.

Ita-Boot kontinua hamoris no haburas misaun ida-ne’e

liuhosi joven sira-ne’ebé hili nia ai-fatin ne’ebé mai hosi Ita-Boot

hodi moris iha vida konsagrada hanesan nia

atu sai sasin Kristu resusitadu, Ita-Oan Mane mesak ba mundu tomak.

Espíritu misaun konsagrada ne’ebé nafatin kontinua aprofunda

no adapta hodi hatán ba sinál no tempu nia mudansa no nesesidade sosiedade ohin loron.

Iha momentu ida-ne’e,

iha São João Bosco nia illas oin,

ami agradese ba Ita-Boot,

tanba Ita haraik ona mai ami, ema santu ida.

Hodi nia prezensa iha fatin ida-ne’e

hanorin ami atu la’o tuir Ita, hanesan nia halo ona,

hodi brani proteze moris

no defende lia-loos no justisa ba moris ema hotu nian.

São João Bosco harohan mai ami no hamutuk ho ami,  

atu ami hadomi Maromak nu’udar ita hadomi Nia

São João Bosco harohan mai ami no hamutuk ho ami,  

atu ami kontinua komunika ho Maromak liuhosi Sakramentu sira,

liuliu sakramentu konfesa no komunga ho fuan-moos.

São João Bosco harohan mai ami no hamutuk ho ami,  

atu ami hatene moris ho loos iha komunidade no fiar iha Maromak.

São João Bosco harohan mai ami no hamutuk ho ami,  

atu ami sai misionáriu batizadu

ne’ebé brani atu haklaken Maromak ho loos.

São João Bosco harohan mai ami no hamutuk ho ami,  

atu ami-nia labarik no joven sira moris iha paz no justisa nia laran

hodi kria paz ba mundu no hadomi moris.

Hamutuk ho São João Bosco no Inan Maria Sarani hotu nia Inan

ne’ebé Ita-Boot fihir ba nia nu’udar mestra,

no hamutuk ho natureza ne’ebé hale’u ami,

no anju santu sira hotu iha lalehan

Ami hahí no adora Ita-Boot Maromak Aman ne’ebé bele buat hotu

no hatene buat hotu,

haraik mai ami grasa uniaun nu’udar komunidade ida

ne’ebé hadomi no kuidadu Ita-nia imajen iha ami ida-idak nia an

nu’udar Ita-Boot nia sidadaun eskollidu, sidadaun Timor-Leste, sidadaun lalehan iha mundu ida-ne’e,

ne’ebé kontinua  hetan bensaun no protesaun husi Ita.

Ami harohan ne’e hodi Jezús Kristu nia naran hamtuk ho Espíritu Santu. Amen.

Ami Aman iha lelehan 1x

Ave Maria 3x

Glória 1x

Orasaun despedida ba illas São João Bosco

São João Bosco, ami agradese ita, tanba ita lori Maromak nia imajen iha ita-nia an mai ami, tulun ami no harohan mai ami ba Aman Maromak atu ami hotu brani defende no hadomi imajen lo-loos Maromak nian iha ami-nia an no iha ema hotu, liuliu sira-ne’ebé kuran liu. Amen.

Ita harohan

Aman Maromak ami agradese Ita-Boot ba Ita-nia prezensa iha São João Bosco ne’ebé mai ona vizita ami no hanorin ami hodi esperiésia Ita-Boot nia di’ak ba ami-nia moris.

Aman Maromak ami agredese Ita-Boot ba grasa ne’ebé ami presiza iha moris ida-ne’e, liuhosi Ita-nia atan santu Don Bosco ne’ebé eduka ona ami atu moris iha paz no hadomi moris ne’ebé Ita haraik mai ami.

Aman Maromak, ami husu Ita-boot haraik mai ami forsa espirituál no matenek atu bele kontra hasoru sala ne’ebé mai hosi tentasaun espíritu aat, tantu iha ami-nia laran, ema seluk no sasán sira-ne’ebé bele sai meiu hodi halo ami monu ba sala.

Aman Maromak haraik grasa mai ami hotu Ita-Boot nia sidadaun atu laran-metin iha Ita no laran-metin ba buat di’ak hotu ne’ebé mai hosi Ita. Ami harohan hodi Kristu hamutuk ho Espíritu Santu. Amen.

Ami Aman 1x

Ave Maria 3x

Glória 1x

 Husi: Crisogno Soares Freitas Pereira

2019