Mensajen Santu João Paulo II ba akólitu sira iha mundu tomak

Iha fulan Abril 1980, liu rihun sanolu akólitu sira ne’ebé mai hosi nasaun walu be halo peregrinasaun iha Roma. Iha loron 9 Abril, lorokraik, akólitu sira hetan bemvindo hosi Papa João Paulo II, no akólitu sira hetan oportunidade atu selebra Eukarístia hamutuk ho Santu Padre iha Vatikanu. Iha momentu ne’ebá, Santu Padre fó ómilia espesiál ba akólitu sira be asisti selebrasaun Eukarístia no mós ba akólitu sira iha mundu tomak. Tanba ne’e, livru ne’e di’ak liu hahú ho mensajen importante no espesiál ba akólitu sira iha mundu tomak hosi ómilia Santu Padre João Paulo II (Papa Katólika Roma 1978-2005). Iha loron 24 Abril 2014, Igreja Katólika Roma, liuhosi Papa Francisco, kanoniza Santu Padre João Paulo II nu’udar Santu João Paulo II.

Ómilia Santu João Paulo II ba akólitu sira iha mundu tomak, iha tinan 1980

Ha’u-nia maluk doben sira be ha’u hadomi, ha’u haksolok tebes selebra Eukarístia hamutuk ho imi hotu. Iha imi-nia nasaun ida-idak, imi bain-bain ona hala’o kna’ar ajuda imi-nia amu-lulik ka bispu sira. Imi hatene katak bispu sira mak susesór Apóstolu sira-nian. Maibé, agora imi hale’u bispu Roma. Nia mak susesór Apóstolu Pedro. Nia (Saun Pedro), Jezús Kristu hili nu’udar bibi-atan ba ninia disípulu sira, atu hala’o servisu hamutuk.

Imi fiar iha Jezús Kristu no iha imi-nia fuan simu ona Jezús Kristu nia grasa. Maibé iha sorin seluk, imi oferese imi-nia an espesialmente ba Jezús Kristu iha kna’ar servisu be imi hala’o iha orasaun. Iha ne’e, imi esperiénsia dalabarak, katak, Nai Jezús konvida no simu ninia disípulu sira atu hela ho Nia besik liután.

Nai be moris hias ona no sa’e ba lalehan, mak, Nai be prezente no hala’o nia kna’ar iha sakramentu sira Igreja nian, espesiál iha sakramentu Eukarístia. No imi, be halo kna’ar orasaun iha altar santu, hetan priviléjiu no ksolok atu bele hela besik liután ho Kristu.

Loos duni katak, litúrjia la’ós atividade ida mesak iha Igreja Katólika. Haklaken mós, iha papel importante liu atu hamoris, dezenvolve no forma filafali fiar ne’e rasik. Imi rasik aproveita. Iha mós orasaun privada, iha ne’ebé ema ko’alia ho Maromak, tantu mesak no ho maluk sira seluk. Iha mós obra apostuladu no karidade: karidade mak sinál identidade Kristu nia disípulu sira. Maibé, atividade hotu Igreja nian hasentru iha litúrjia, nu’udar ninia pontu kulminante. Nune’e mós, litúrjia sai fonte ba Igreja nia forsa. Iha ne’e, Maromak nia promesa sai forte liután no povu hetan santidade, ita hotu fó glória ba Maromak no haforsa relasaun karidade ho Igreja.

Ha’u-nia maluk sira, kona-ba imi ida-idak nia kna’ar nu’udar akólitu, imi akompaña amu-lulik, ne’ebé hala’o ninia kna’ar iha Jezús Kristu nia naran. Tanba kna’ar be imi hala’o ne’e, sai roman be haroman nakukun, katak, boot tebes duni mistériu Eukarístia. Rona ba! saida mak bispu sira ko’alia iha konsíliu ikus ne’e, katak: “iha selebrasaun litúrjia ema ida-idak, tantu selebraante no leigu sira, tenke hala’o ninia kna’ar ho kompletu, la-liu no la-menus, tuir lisan no lei litúrjia nian. Nune’e mós, ba servidór/a orasaun (inklui imi, akólitu sira!), leitór sira no membru kantór sira tenke hala’o sira-nia kna’ar ho di’ak, furak no loos, programadu, refletivu, atu nune’e, kna’ar sira ba kada personajen iha Igreja laran sai di’ak liu, no Maromak nia povu bele sente sentidu litúrjia ne’e rasik ho kompletu (bazeia ba Sacrosanctum Concilium, 28-29).

Asuntu ne’e, vigor, liu-liu ba labarik no joven sira be sai ‘akólitu’, ‘ajuda Missa’, ‘servidór/a altar, ka oinsá imi hanaran grupu ne’e ho imi-nia língua rasik. Imi akompaña amu-lulik ba altar, akompaña nia bainhira reza, no fó ba nia saida mak presiza ba sakrifísiu santu ne’e. Ho fraze badak, imi hala’o kna’ar kuaze hotu, kna’ar ema ‘akolitu’ ida (Akolitu ne’e etapa ida ba ema teologadu be prepara-an atu simu ordenasaun diakonadu), maski imi la-iha kna’ar kareira formál ka tama iha estrutura hierarkia Igreja Katólika.

Sei iha mós kna’ar seluk be imi presiza atu hala’o, atu nune’e Eukarístia bele selebra ho di’ak, furak no loos, katak, kna’ar ‘leitór’ mós importante liu iha imi-nia leet; nune’e mós kna’ar ‘kantór sira’, espesiál ba sira be hala’o kna’ar kantór/a labarik, joven no adultu. Kna’ar sira ne’e nu’udar responsabilidade povu hotu nian be selebra litúrjia, tantu feto no mane. Kuandu kna’ar sira ne’e hotu hala’o ho di’ak no loos, selebrasaun hotu litúrjia nian sai furak liu, no partisipasaun povu sai kle’an.

Ha’u bele dehan mós ba sira be hasa’e buat karak iha ofertóriu. Sasán sira ne’ebé oferta, bele haree nu’udar símbolu ba buat hotu be lori sa’e husi povu iha selebrasaun Eukarístia nu’udar sakrifísiu ba Maromak no sai oferta espirituál. Entre sasán sira be hasa’e, inklui mós paun no tua, be sei sai Jezús Kristu nia Isin no Raan.

Ha’u-nia maluk sira be di’ak, kna’ar hotu ne’e presiza preparasaun be di’ak. Imi tenke koko atu komprende litúrjia. Liu fali ida ne’e, imi tenke fó testemuña kona-ba Kristu no kona-ba Igreja ho dalan oin-oin. Hala’o kna’ar akólitu no hanorin kona-ba Kristu no Igreja mak kna’ar edukasaun hosi imi-nia grupu, iha ne’ebé imi inklui imi-an atu reza no halo apostuladu.

Ha’u espera tebes, atu iha ne’ebé de’it, previléjiu litúrjia haforsa filafali, atu nune’e,  litúrjia hala’o nu’udar hahalok be loos no santa, tanba litúrjia halo relasaun ita ho Kristu be santu tebes. Ha’u hakarak atu povu sarani sira tuir iha selebrasaun litúrjia ativamente, nakonu ho fiar, respeitu, refletivu no ho ksolok boot. Imi bele kontribui barak atu to’o ba hanoin ideál ne’e.

Naroman ona, ha’u-nia maluk doben sira, katak imi-nia servisu halo relasaun imi ho kna’ar santa ne’e, be hala’o husi amu-lulik sira, kuandu nia (amu-lulik) selebra Eukarístia no sakramentu sira seluk iha Kristu nia naran rasik.

Maibé, imi hakarak tebes atu nafatin iha amu-lulik sira be imi hakarak? Maromak nia povu la-bele moris kuandu la-iha amu-lulik sira. Imi hatene katak imi-nia nasaun presiza vokasaun nai-lulik. Ha’u hakarak ko’alia espesialmente ho imi labarik joven sira no joven sira be partisipa iha ne’e. Ha’u dehan ba imi: Oinsá kona-ba imi? Imi mós dalaruma hanoin katak, posibel imi ida-idak Jezús Kristu konvida atu halo relasaun amizade no íntima ho Nia, atu fó an tomak hala’o kna’ar be aas liu, nu’udar Ninia amu-lulik? Ne’e sei sai grasa boot liu ba imi ida-idak, ba imi-nia família, ba imi-nia parókia, ba sarani Katólika be hein sira-nia amu-lulik sira!

Loos katak, grasa vokasaun ne’e la’ós buat opresaun ida. Jezús dehan, “kuandu ó hakarak.” Maibé, ha’u haree labarik joven barak, iha tempu ohin loron ne’ebé brani atu hola risku ida! Ha’u fiar katak, barak hosi sira brani husik buat hotu atu tuir Kristu no kontinua Ninia apostuladu. Imi tenke brani hasoru pergunta ne’e ho onestu. Dalan ne’ebé imi hili hodi hala’o kna’ar ne’e, iha tempu ne’e, prepara imi atu hatán Maromak nia bolu iha Nia tempu.

Finalmente, fiar ba katak Amu-Papa hadomi tebes imi. Nia hein buat barak hosi imi. Ho fuan nakonu, ha’u fó bensaun ba imi. Ha’u-nia mensajen furak ba imi mak “Servisu ba Maromak, Servisu ba Nia ho Ksolok”.

São João Paulo II

Papa Katólika Roma (1978-2005)