Orasaun domin

Rai, tasi no lalehan

Nai nia liman rohan.

Buat moris hotu haksolok Nia naran

Hananu Santu ba Nia naran.

Tanba domin, Nai fó mai ha’u domin

Hosi feto ida, feto ne’ebé hafurak ona ha’u ho domin.

Nai haruka ha’u

Kuidada no hadomi domin nain,

Nia mak domin no funu nia nain.

Ha’u harohan…

Nai…kuidadu nia nafatin iha moris ne’e

Haforsa ha’u iha tempu moris ida-ne’e

Atu hadomi nia to’o ha’u taka matan,

Nia ne’ebé ko’us ona ha’u ho nia bee-matan.

Ha’u hakarak sadere ha’u-nia ulun iha nia hitin

Feto ne’ebé ha’u hadomi liu

Bainhra ha’u taka matan ba nafatin.

Maski dalaruma nia la komprende,

Ajuda ha’u atu komprende.

Maski nia dúvida ba ha’u-nia domin,

Ajuda ha’u atu fiel ba domin.

Maski nia hirus no si’ak,

Ajuda ha’u responde di’ak.

Maski nia hakarak dook liután,

Ajuda ha’u atu besik liután.

Maski nia haluha ha’u iha moris,

Ajuda atu hanoin nia ba moris.

Nia mak ha’u-nia imajen moris nian

Hosi nia ha’u koñese ha’u-nia an.

Nia mak ha’u-nia murak-mean,

Ne’ebé Ita haraik mai ha’u an.

Ha’u kuidade nafatin iha silénsiu laran

Ho sakrifísiu ne’ebé moos to’o ha’u taka matan.

Obrigadu Nai. Amen.

Hosi: Cris, Sfp