17 Novembru Santa Isabel hosi Hungria

Isabel mak oan-feto hosi liurai Hungria. Nia moris iha tinan 1207. Isabel kaben ho Louis, liurai Thuringia, bainhira nia sei joven liu. (ita mós selebra Beato Louis nia festa iha loron 11 Setembru). Isabel mak noiva be bonita, ne’ebé hadomi liu ninia laen ne’ebé bonitu. Louis responde ninia feen nia domin ho fuan tomak. Maromak haraik ba sira oan nain tolu no sira moris hamutuk ho ksolok durante tinan neen nia laran.

Tuir mai, Isabel moris iha susar nia laran. Louis mate tanba moras gripe iha tempu ne’ebá. Isabel laran-triste liu to’o halerik: “mundu mate ona ba ha’u, mundu ho ninia ksolok tomak.” Louis ninia maun-alin sira la-gosta Isabel, tanba Isabel fahe ai-hán ba ema ki’ak no mukit sira. Durante Louis sei moris, nia maun-alin sira la-bele halo buat ida. Maibé agora, sira bele halo saida de’it mak sira hakarak. Ikus mai, sira duni sai Isabel no ninia oan nain tolu sai hosi kastelu. Isabel no ninia oan sira hamlaha no malirin. Maibé, Isabel la-keisa ba ninia terus ne’e, nia fó agradese ba Nai no reza maka’as liután. Isabel simu terus ne’e nu’udar ksolok ida ba nia.

Isabel ninia maun-alin sira mai tulun nia. Nia no ninia oan sira hetan filafali fatin atu hela. Isabel nia tiu hakarak atu Isabel kaben filafali, tanba nia sei nurak no bonita. Maibé, Isabel halo ona desizaun atu entrega ninia-an tomak ba de’it Nai. Nia hakarak imita espíritu pobreza Santu Francisco. Isabel tuir mai hela iha vila ki’ak ida no fó nia tempu ikus moris nian atu serbí ema ki’ak no moras sira. Iha ninia misaun ne’e, nia ba kail ikan nu’udar ninia esforsu atu hetan osan hodi ajuda ema ki’ak sira be nia hadomi. Santa Isabel ho tinan ba 24 husik mundu ida ne’e. Banhira nia besik atu mate, ema sira rona nia hananu ho neneik iha nia toba fatin. Nia fiar liu katak, Jezús sei mai no lori nia ba Nia. Isabel mate iha tinan 1231.

Santa Isabel iha domin be boot liu ba ema ki’ak. Nu’udar disípulu Kristu nian, ita mós hetan konvite atu sai laran-di’ak no laran-luak ba ita-nia maluk sira-nia terus