14 Novembru Saun Lorenço O'Toole

Santu Lorenço O'Toole

Lorenço moris iha Irlanda iha tinan 1128. Nia aman ema funsionáriu boot ida. Bainhira nia halo tinan sanolu, liurai viziñu ida tama iha ninia aman nia área hodi funu hasoru nia aman, ikus mai liurai ne’e mós lori lakon tiha Lorenço ba nia rain. Labarik Lorenço ne’e terus durante tinan rua nia laran. Tuir mai Lorenço nia aman husu ba liurai ne’e atu husik ninia oan mane ba bispu ida. Bainhira liurai ne’e halo tuir ninia aman nia pedidu, Lorenço nia aman mai hasoru nia oan mane. Ho fuan kontente no agradese, nia lori Lorenço ne filafali ba sira uman.

Ninia aman iha hakarak atu ninia oan mane ida serbí no fó-an tomak ba Igreja. Bainhira nia husu hela ba nia-an sé loos mak sei sai hanesan ninia hakarak, ho hamnasa, Lorenço dehan ba ninia aman atu la-bele hela iha konfuzaun nia laran. “Ida ne’e mak ha’u-nia hakarak no mehi boot” dehan Lorenço. “Ha’u-nia parte hosi ha’u-nia moris tomak mak serbí Nai no Ninia Igreja” nia klarifika liután. Tanba ne’e, ninia aman gia nia no lori nia hodi entrega nia ba bispu. Lorenço tuir mai sai amu-lulik no mestre (retór) ba konventu boot ida. Iha tempu ida, akontese krizi ai-hán, iha ne’ebé ai-hán sira defisil atu hetan iha fatin refere. Mestre di’ak ne’e fahe ai-hán ba komunidade sira be hela besik ninia konventu atu sira la-bele hamlaha. Lorenço mós tenke hasoru no rezolve problema barak ne’ebé relasiona ho ninia pozisaun nu’udar lider ba konventu. Nu’udar relijiozu, kritika nia tanba disiplina liu. Maski nune’e, Lorenço nafatin gia ninia komunidade ho dalan halo sakrifísiu. Iha mós problema ho ema na’uk-teen sira ne’ebé hela iha foho leten besik sira-nia konventu. Maski nune’e, la-iha buat ida ne’ebé halo Lorenço O’Toole nakdedar.

Ikus mai Lorenço sai famozu, no tuir mai fihir nia sai Arcebispu Dublin. Ho ninia pozisaun be foun ne’e, nia moris santu durante ninia moris tomak. Loron-loron, nia konvida ema ki’ak sira atu sai ninia bainaka importante liu. Iha parte sorin, nia fó ajudu ba ema barak. Lorenço hadomi liu ninia sarani sira no ninia Nasaun Irlanda no nia halo maneiru oin-oin atu halo povu sira moris di’ak no hakmatek. Iha loron ida, ema bulak baku Lorenço bainhira nia atu ba altar atu selebra missa. Lorenço monu no la-konxiente ba nia-an. Maibé, minutu tuir mai kedas, Lorenço di’ak filafali no hamoos ninia kanek sira hotu, no tuir mai selebra missa.

Depoizde tinan barak serbí Uma Kreda, Santu Lorenço O’Toole moras todan. Bainhira ema husu ba nia katak, “bele hakerek hela karta ruma?” Bispu Santu ne’e hamnasa ki’ik no hatán “Nai Maromak hatene katak ha’u la-iha buat ida iha mundu ne’e.” Tanba hatudu ona katak durante nia forte, nia fó tomak ninia riku-soin sira ba ema hotu, hanesan ho nia fó tiha ona ninia-an tomak ba Nai Maromak. Santu Lorenço O’Toole mate iha loron 14 Novembru 1180. Nia hetan kanonizasaun nu’udar santu hosi Papa Honorius III iha tinan 1225.

St. Lorenço konxiénte katak importante hamrik metin atu halo saida de’it mak di’ak, maski laloran krítika mosu.