ORASAUN VENERASAUN BA SAUN TARSÍZIU

Hodi Padre, hodi Filho, hodi Espíritu Santo nia naran. Amen.

Hanoin buka salan hot-hotu

HA’U KONFESA

Ha’u konfesa ba Maromak bele halo hot-hotu no mós ba imi maun-alin sira, ha’u sala fila-fila, hodi hanoin, hodi hateten, hodi halo, hodi la-tuir obrigasaun, ha’u beik sala, ha’u beik sala la-di’ak liu. Ne’e duni, ha’u husu ba Maria Virjen ba anju no santu hotu, no mós ba imi, maun-alin sira, atu harohan ba Maromak tanba ha’u.

INTENSAUN LORON-LORON NIAN

Sengunda-feira: Ba ita-nia santu Padre Papa Francisco, ba amo Bispo sira hotu ne’ebé fahe Maromak nia grasa no futar lia fuan ba ema sira, atu hodi Espíritu Santu nia tulun, sira bele ukun Santa Kreda ho neon no laran tomak.

Terça-feira: Ba ema sira hotu ne’ebé ukun povu, atu Maromak buat hotu nia Nain, hanorin sira ukun ho justisa atu ema tomak hetan di’ak.

Quarta-feira: Ba família sira hotu iha mundu rai klaran, ita husu Maromak kuda iha sira ida-idak nia fuan Nai nia domin atu inan no aman bele hola responsabilidade ba sira nia kna’ar hodi taumatan no tulun oan sira.

Quinta-feira: Ba labarik no joven sira, ne’ebé namkari iha mundu, liu-liu iha ita-nia nasaun Timor-Leste, ita husu Nai hakonu iha sira fuan, domin no paz, atu nune’e, sira bele sai joven di’ak iha futuru ba Nasaun no ba Igreja.

Sexta-feira: Ba akólitu sira ne’ebé namkari iha Kreda Timor Lorosa’e, atu Maromak hakonu iha sira fuan domin no laran badinas atu serbí Maromak iha Ninia Kreda.

Sábado: Ba ema kbi’it laek sira, ita husu Maromak ne’ebé laran-di’ak atu haraik ba sira ida-idak grasa barak be sira kuran, liu-liu haraik ba sira kbi’it no forsa atu sira bele iha esperansa ba moris.

Domingo: Paz ba mundu, ita husu harohan da’et santu Tarsíziu nian ba ema hotu, atu ema hotu ne’ebé moris iha mundu ida ne’e, bele harii paz iha sira  fuan no mós paz ba ita rai.

KREDO

Ha’u fiar Maromak mesak ida de’it, Aman bele halo hot-hotu; halo ona lalehan ho rai, no buat hotu ema haree no mós la-haree; ha’u fiar Nai ida de’it, Jezús kristu, Maromak Oan Mane Mesak, moris nanis hosi Aman, molok tempu hahú; Maromak hosi Maromak, Naroman hosi Naroman, Maromak loos hosi Maromak lo-loos. Aman hahoris la-halo Nia, Ida de’it ho Aman. Hosi Nia buat hotu mosu, tan ita ema, atu soi ita. Nia tun mai hosi Lalehan. Hodi Espíritu Santu, nia moris hahú-An. Hosi Maria Virjen, halo-An ba Mane. Tan ita, ema hedi Nia ba kruz, iha Ponsiu Pilatus nia ukun; Nia terus to’o mate, ema hakoi Nia. Liu loron tolu, Nia moris hias, tuir Eskritura. Sa’e ba lalehan, hatodan-an iha Aman nia kuana. Nai sei fila ho kbi’it wain, atu halo justisa ba ema moris no ba ema mate; Nia ukun sei rohan la’ek. Ha’u fiar Espíritu Santu, Nai be haraik moris; mai hosi Aman no Oan; ema hanai, hahii hamutuk, ho Aman no Oan: Nia mak lia tun, hosi profeta sira. Ha’u fiar Kreda ida mesak, Santa, Katólika, Apostólika. Ha’u fiar Batizmu ida de’it atu kasu sala. Ha’u hein katak mate sira sei moris hias, moris foun sei mosu mai. Amen.

AMI AMAN

Ami Aman iha lalehan, tulun ema atu hahii Ita Naran, halo Ita-nia Reinu to’o mai ami. Haraik tulun ba ema, atu tuir Ita hakarak iha rai nu’udar iha lalehan.

Ohin ne’e haraik ai-han loro-loron nian mai ami; haraik perdua ba ami sala nu’udar ami perdua ema halo aat ami, la-bele husik ami monu ba tentasaun, maibé hasai ami husi buat aat. Amen.

AVE MARIA

Ave Maria grasa barak liu, iha ita-boot Nai Maromak ho ita-boot, ita-boot di’ak liu feto hot-hotu, ita-boot nia Oan Jezús di’ak liu.

Santa Maria Maromak nia Inan, harohan ba Nai Maromak tanba ami salan, oras ne’e ho oras ne’ebé ami ata besik atu mate. Amen.  (3x).

GLORIA

Gloria ba Padre, ba Filho, no ba Espíritu Santo. Nu’udar hori uluk, oras ne’e, tinan ba tinan nafatin. Amen.

O Maria Inan sala laek

Haraik tulun mai ami ne’ebé husu Ita-Boot nia tulun

O Jezús haraik perdua ba ami salan

Keta husik ami monu ba ahi infernu nian lori klamar sira ba lalehan liu-liu ba sira ne’ebé ema haluha atu harohan bá

Santu Tarsíziu

Harohan mai ami ba Jezús iha Óstia Konsagrada.

MISTÉRIU

Mistériu Gozozu (Segunda, Sábadu)

1. Anju Saun Gabriel fó hatene Maria katak nia sai Maromak nia Inan
2. Maria vizita-nia prima santa Isabel
3. Kosok Oan Jezús moris iha bibi-luhan ida iha rai Belén
4. Nai Feto aprezenta kosok oan Jezús ba iha uma kreda boot Jeruzalén
5. Jezús lakon hori loron tolu ita Nai Feto hetan fali Nia iha uma Kreda boot Jeruzalén

Ami Aman, Ave Maria 10x, Glória, O Maria, O Jezús, Santu Tarsíziu, harohan mai ami ba Jezús iha Óstia Konsagrada.

Mistériu Dolorozu (Tersa, Sexta)

1. Jezús ho neon-sala halo orasaun iha to’os Oliveira
2. Ema kaer Jezús baku nia isin halo mesak kanek
3. Ema hale’u ai-tarak iha Jezús nia futar ulun
4. Jezús lori nia Kruz ba to’o iha foho Kalvariu
5. Ema hedi Jezús iha Kruz terus to’o mate tanba ita ema nia sala

Ami Aman, Ave Maria 10x, Glória, O Maria, O Jezús, Santu Tarsíziu, harohan mai ami ba Jezús iha Óstia Konsagrada.

Mistériu Luminozu (Kinta)

1. Jezús simu Baptizmu iha mota Jordaun husi Saun João Baptizta
2. Jezús halo milagre dala uluk iha festa Kanaã
3. Jezús haklaken Maromak nia reinu ba ema tomak
4. Jezús hatudu-An lo-loos iha foho Tabor
5. Jezús han kalan ikus ho Nia eskolante sira no institui Eukarístia ba dala-uluk

Ami Aman, Ave Maria 10x, Glória, O Maria, O Jezús, Santu Tarsíziu, harohan mai ami ba Jezús iha Óstia Konsagrada.

Mistériu Gloriozu (Kuarta, Domingu)

1. Jezús mate tiha liu loron tolu Nia moris hias
2. Jezús sa’e rasik ba lalehan
3. Espíritu Santu tun mai hosi lalehan hodi tama iha Apóstolu sira no Nai Feto iha Sanákulu
4. Nai Maromak hasa’e ita Nai Feto ba lalehan
5. Nai Maromak harai Glória boot ba Maria Santísima

Ami Aman, Ave Maria 10x, Glória, O Maria, O Jezús, Santu Tarsíziu, harohan mai ami ba Jezús iha Óstia Konsagrada.

SALVE LIURAI FETO

Salve Liurai feto, inan hanoin ami nia rahun di’ak, ami nia esperansa salve. Ami ata, Eva nia oan desterradu, hasa’e ami nia lian ba ita-boot hodi tanis, ami husu de’it Ita-boot tulun ami ata iha tanis fatin ne’e. Ne’e duni ami nia advogada, fila mai ami ata Ita-boot nia matan di’ak. Desterro ne’e hotu hatudu mai ami ata Ita-boot nia oan Bendito Jezús. Oh klemente, oh piedosa, oh doce Virjen nafatin Maria.

Maromak nia Inan santa, harohan mai ami ata.

Ami atu bele hetan Jezús Kristu nia rahun di’ak. Amen.

LADAIÑA  SANTU  TARSÍZIU NIAN

Nai sadia ami                                                                                       

Kristu sadia ami                                                                                

Nai sadia ami                                                                                        

Jezús Kristu rona ami                                                                       

Jezús Kristu simu ami nia hamulak                                                 

Maromak Aman lalehan nian, sadia ami

Maromak Oan, Maksoin mundu nian, sadia ami

Maromak Espíritu Santu paráklitu, sadia ami

Tarsíziu Diákono Santísimu Sakramentu                                                                 harohan mai ami

Tarsíziu Joven jenerosidade                                                                                                   "

Tarsíziu Joven ne’ebé laran moos                                                                                          "

Tarsíziu Joven ne’ebé iha devosaun ba Santisímu Sakramentu                                             "

Tarsíziu Disiplo Kristu nian                                                                                                   "

Tarsíziu Martiríu ba Santísimu Sakramentu                                                                          "

Tarsíziu Patrono  akolitus sira nian                                                                                        "

Tarsíziu Patrono  ba joven sira                                                                                               "

Tarsíziu Servidor ne’ebé laran nakloke                                                                                  "

Tarsíziu Servidor Liturjia                                                                                                       "

Tarsíziu Servidor ne’ebé prontu                                                                                             "

Tarsíziu halo tuir Maromak nia hakarak                                                                                "

Tarsíziu hasa’e buat hotu ba Nai                                                                                            "

Tarsíziu ne’ebé fiel                                                                                                                 "

Tarsíziu Joven ne’ebé aten brani                                                                                            "

Tarsíziu Joven ne’ebé laran manas ba Kristu nia kreda                                                         "              

Tarsíziu Kolaborador salvasaun ba prizioneirus sira                                                              "

Tarsíziu Joven ne’ebé brani ba persegidos sira                                                                       "

Tarsíziu Joven ne’ebé kastu                                                                                                     "

Tarsíziu Joven ne’ebé justu                                                                                                      "

Tarsíziu Joven ne’ebé badinas                                                                                                  "

Tarsíziu Joven ne’ebé sakrifika-an ba Kristu                                                                           "

Tarsíziu Joven ne’ebé  hamrik metin                                                                                        "

Tarsíziu Joven ne’ebé kuidadu Óstia Santa                                                                              "

Tarsíziu Joven ne’ebé kontente                                                                                                 "

Tarsíziu Joven orasaun nain                                                                                                      "

Tarsíziu Joven ne’ebé fó-an tomak ba Kristu                                                                            "

Maromak nia Bibi Oan be kasu mundu nia salan          --   perdua ami nain

Maromak nia Bibi Oan be kasu mundu nia salan          --  rona ami nain

Maromak nia Bibi Oan be kasu mundu nia salan          --  sadia ami nain.

ORASAUN

Nai Maromak, tan Ita-boot nia domin ne’ebé boot mai ami no haraik mai ami Santu Tarsíziu hodi sai protetor mai ami ida-idak. Ho fuan ho laran ami husu ba Ita, atu nu’udar Ita hakarak ba  sto. Tarsíziu ne’ebé fiel no metin iha nia desizaun sira. Tan ne’e hanorin mós ami atu ami bele banati tuir sto. Tarsíziu nia hahalok no nia exemplu sira, hodi brani no hatan nafatin ba Ita-nia hakarak. Ami harohan ne’e hodi Nai Jezús Kristu nia naran, hamutuk ho Espíritu Santu. Amen.

ORASAUN ATU HASA’E-AN BA ITA NAIN FETO

Ha’u-nia Nain Feto, ha’u-nia Inan, ha’u hasa’e  ha’u an tomak ba Ita-boot, atu hatudu ha’u-nia neon-loos ba Ita-boot; ohin ne’e, ha’u hasa’e ha’u-nia matan, tilun, ibun, fuan, isin no klamar, ba Ita-boot Nia liman, nune’e ha’u ata Ita-boot nian. Ha’u-nia Inan di’ak liu hot-hotu tulun ha’u ata, hein didiak ha’u ata nu’udar sasan oan ida Ita-boot nian rasik. Amen.

Nain Feto ami nia Inan di’ak keta haluhan ami Ita-boot nian

Hein ami ata tulun ami ata nu’udar sasan oan Ita-boot nian.

ORASAUN ATU HASA’E AN BA JEZÚS FUTAR FUAN

Nai Jezús Maksoin ema tomak nian, tau matan mai ami, ne’ebé ho haraik-an hakneak iha Ita-boot nia altar oin. Ami Ita-boot nian, no ami hakarak pertense duni ba Ita-boot, atu bele moris metin di’ak liután hamutuk ho Ita-boot, iha loron ida ne’e, ami ida-idak hakarak hasa’e ami an ba Ita-boot nia Futar Fuan Santu. Nai sei iha ema barak ne’ebé seidauk hatene Ita-boot, barak hewai Ita-boot nia ukun fuan hodi se kotuk ba Ita-boot. Nai Jezús sadia sira ne’e hotu halibur sira iha Ita-boot nia Futar Fuan. Nai Ita-boot la-ukun de’it sarani sira ne’ebé metin nafatin ba Ita, maibé ukun mós sira ne’ebé fila kotuk ba Ita-boot, tulun atu sira fila hikas lalais ba Aman nia uma, atu labele hetan susar no hamlaha. Nai ukun mós sira ne’ebé moris iha nakukun laran oh haketak-an hosi Ita-boot la-fó laran ba malu, loosi hikas fali sira ba dalan loos, ba fiar ida de’it no Nain ida de’it, atu la-kleur bele iha bibi luhan ida de’it no Nain ida de’it. Nai tahan Ita-boot nia kreda, hadook nia hosi buat a’at hotu no fó ba nia liberdade loos nian. Haraik hakmatek no paz ba ema tomak, haraik tulun atu hosi rai ulun to’o rai ikun, ema tomak bele rona lia ida de’it, Gloria ba Jezús Futar Fuan Santu ne’ebé haraik salvasaun mai ita, hahi, hanai ba Nia, tinan ba tinan nafatin. Amen.

ORASAUN BA SANTU TARSÍZIU

Santu Tarsíziu, ita-boot hatudu ona mai ami, katak ami tenke oferese-an sakrifika buat hotu ba de’it Nai Jezús. Ita fó ita-an to’o mate tanba hadomi  ba Santísimu Sakramentu. Tulun ami atu sai akólitu be di’ak ne’ebé nunka mai tarde, nafatin nakonu ho atensaun, reza maka’as no loloos, no hadomi Nai Jezús ho fuan no laran tomak. Amen.

ORASAUN BA ANJO HEIN ITA

Nai  Maromak nia anjo santu, hein didiak ha’u, ukun ha’u nafatin, halo ha’u tuir di’ak de’it, tanba Nai Maromak rasik mak entrega ha’u iha Ita-boot nia liman. Amen.

ORASAUN BA SAUN ANJU MIGUEL

Saun Anju Miguel, liurai boot, nai ulun soldadu lalehan nian, seguransa ba ema hotu nia klamar, halakon anju aat sira, taumatan ba Maromak nia uma kreda ida ne’e iha Jezús Kristu. Ami-nia lideransa Anju Miguel ne’ebé ami respeita, be Aman Maromak haraik ba ita-boot prefeisaun no virtude be di’ak, ami ho fiar husu ita-boot nia ajuda atu hasai ami hosi moras sira no buat aat hotu. Hodi ita-boot nia seguransa be prefeitu, halo ami atu serbí Nai ho fiel loron-loron iha ami-nia kna’ar nu’udar Jezús Kristu nia servidór. Harohan mai ami anju Miguel liurai Igreja Jezús Kristu nian, atu ami bele hola parte iha Kristu nia promesa. Amen.

ORASAUN BA SAUN ANJU RAFAEL

Saun Anju Rafael, protetór ba ami-nia viajen, akompaña ami iha viajen mundu ne’e nian, gia no hatudu dalan mai ami atu ami nafatin la’o iha dalan salvasaun nian. Ho Aman Maromak nia kbi’it, proteze no hasai ami hosi tentasaun no diabu nia babeur. Tanba Ita-Boot mak Maromak nia ai-moruk, ho haraik-an ami husu, kura ami hosi moras oin-oin isin no klamar nian. Hein katak ho ita-boot hamutuk ho anju santu sira, santu Tarsíziu, ami bele hahii, hanai Aman Maromak ba nafatin. Amen.

ORASAUN BA SAUN ANJU GABRIEL

O Anju boot Saun Gabriel, ami husu ba ita-boot, sai ami-nia intersesór iha Maromak nia kadunan santu ba ami-nia nesesidade agora nian, hanesan iha tempu ne’ebé ita-boot hato’o mistériu inkarnasaun ba Virjen Maria. Hein katak liuhosi orasaun no ajuda hosi ita-boot iha lalehan, ami bele hetan grasa be hanesan, no bele hanai Aman Maromak ba nafatin iha moris ne’e. Amen.

ORASAUN BA AI-KRUZ SANTA KRISTU NIAN

Hahii Nai Jezús be mate iha Ai-Kruz, hedi ba ita-nia sala. Kristu Santu be hedi iha kruz, nafatin hela ho ami. Kristu Santu be hedi iha kruz, Ita-Boot mak naroman rohan-laek ba ami-nia família. Kristu Santu be hedi iha kruz, mai iha oras ami besik atu mate. Kristu Santu be hedi iha kruz, proteze ami hosi kastigu. Kristu nia Ai-Kruz santa, ami sai morin iha Ita. O Jezús hosi Nazaré be hedi iha kruz, proteze ami hosi buat aat sira, be haree no la-haree, agora no ba nafatin. Amen.

ORASAUN BA KLAMAR SIRA IHA PURGATORIO

Nai Maromak fó sira hetan rahun di’ak nafatin.

Halo Ita-boot nia naroman leno nafatin sira, halo sira denkansa ho paz. Amen.

Santu Tarsíziu, harohan mai ami ba Jezús iha Óstia Konsagrada. 3x

Maromak bele halo buat hotu haraik bensaun mai ita

+Hodi Padre, hodi Filho, hodi Espíritu Santu sira naran. Amen